ᒋᔨᐛᐤ ᓂᒋᓴᓂᑕᒄ ᐊᓐᑦ
ᒋᓴᒪᓂᑐᐤ ᒋ ᓴᒋᐊᑯᓂᐤ

ᓇᔅᑲᐱ ᐃᔪᐤ ᐃᑐᐅᓐ ᐊᔅᑕᐃᑕᒂᒡ ᐊᓐᑕ ᑯᔅᒋᒂᓱᐅᓐ ᑭᔭ ᐱᒪᑎᓯᔪᐅᓐ ᑭᔭ ᐊᑎᐧᑯᐎᓐᒡ᙮

ᓂᔭᓐ, ᓇᔅᑲᐱ ᐃᔪᒡ ᑲᐸᒡ ᐅᒋᐱᑲᔅᒋᑯᔭᒡ ᐊᔅᒋᔾ ᐊᓄᒡ ᐊᓯᐎᒍᑕᑲᓄᒡ ᒋᐛᑎᓄᒡ ᑯᐸᒃ ᑭᔭ ᓇᐱᑥᐤ ᒐᐃᔅᐱᔅ ᐱᒧᑯᑕᒡ ᐱᒪᑎᓯᔪᐅᓐ᙮ ᓂᑲᓂᓯᓇᓐᒡ, ᐊᔅᒋᔪᐤ ᑲᐅᒡ ᒋᐱᑲᔅᒋᑎᓱᒡ ᑭᔭ ᑲᓇᓴᐛᒡ ᐊᑎᐧᒄ ᐊᓂᔭ ᐊᔅᑕᐃᒪᒡ ᑲᐱᑲᔅᒋᑯᒡ᙮ ᐊᓐᑕ 1950 ᐱᐳᓐ, ᐃᔪᐤ ᐱᒪᑎᓯᔪᐅᓐ ᑲᒥᔅᑎᒥᔅᑯᒋᐱᒡ ᐊᓐᑕ ᐱᔅᒐ ᓇᔅᑲᐱ ᐊᓐᑕ ᑈᑦ ᒐᐃᒧ ᑲᑕᔭᑲᓄᒡ ᐊᓐᑕ ᓴᐱᐸᐤ ᐅᑕᓇᔪᐤ᙮ ᐊᓐᑕ ᒥᓄᐛᒡ ᑲᑕᔭᑲᓄᒡ ᓇᔅᑲᐱ ᒪᔅᑕᔾ ᐊᓐᑕ ᑲᐛᐛᒋᑲᒪᒡ ᐊᓐᑕ 1908 ᐱᐳᓐ᙮ ᓇᔅᑲᐱ ᐃᔪᒡ ᐅᑕ ᑯᐸᒃ ᑲᐎᑲᐳᐎᑕᑲᓄᒡ ᐊᓐᑕ 1984 ᐱᐳᓐ ᐊᓐᑕ ᓇᔅᑲᐱ ᐎᓱᐛᐅᓂᒡ, ᐊᓐᑕ ᑲᓂᔅᑐᐛᐸᑕᑲᓄᒡ ᓇᔅᑲᐱ ᑭᔭ ᒋᒥᔅ ᐱ ᐃᔪᔅᒋᔭ ᐅᔅᑭᒡ ᒐᒋ ᐃᔪᒡ ᐊᔭᔭᑎᓐᑎᓱᒡ ᐅᑕ ᑲᓇᑕ᙮ ᐊᓐᑕ ᑲᐃᔅ ᐎᔭᑲᓄᒡ ᑲᒥᔅᑯᒋᐱᐃᒡ ᓇᔅᑲᐱ ᐃᔪᒡ ᐅᑕ ᑲᐛᐛᒋᑲᒪᒡ ᐊᓐᑕ 1999 ᐱᐳᓐ᙮ ᓇᔅᑲᐱ ᐃᔪᒡ ᐅᑕ ᑲᐛᐛᒋᑲᒪᒡ ᑲᐃᓯᓇᑯᓂᒡ ᐅᑎᑐᔅᒐᐅᓄᐛᐤ, ᐊᓐᑕ ᐛᒋᑐᔅᑲᑯᒡ ᐃᔪᒋᒪᑲᓇ ᑭᔭ ᑲᑐᔅᒐᓯᒡ, ᒐᒋ ᐊᑐᔅᑲᔅᑕᑎᓱᒡ, ᐊᔭᔭᑎᓐᑎᓱᒡ, ᐊᑐᔅᑲᔅᑐᐛᒡ ᑭᔭ ᐛᐎᒐᒡ ᐃᔪᐛ ᑭᔭ ᐎᑲᐳᐎᑕᒡ ᐊᑐᔅᒐᐅᓂᔪᐤ ᒪᒂᒡ ᐊᓐᑕ ᒐᐊᑲ ᐅᓂᑎᓂᒡ ᐃᔪᐤ ᐃᑐᐅᓂᔪᐤ ᑭᔭ ᐃᔪᐤ ᐃᔨᒧᐅᓂᔪᐤ᙮ ᓇᔅᑲᐱ ᐃᔪᐤ ᐱᒪᑎᓯᔪᐅᓐ ᐊᔅᑕᐃᑎᒪᒡ ᒐᐊᑲ ᐅᓂᑕᑲᓄᒡ ᐃᔪᐤ ᐃᔪᐅᓐ ᑭᔭ ᐊᔅᑯ ᐊᑐᔅᑲᔅᑕᑲᓄᒡ ᒐᒋ ᑲᓄᐛᐃᑕᑲᓄᒡ ᐃᔪᐤ ᐃᑐᐅᓐ ᑭᔭ ᐊᔅᑯ ᐊᔅᑯᑎᒧᐛᑲᓄᒡ ᓂᑲᓄᒡ ᐛᓴᒡ᙮

ᐊᓐᑕ ᐅᑕᒡ ᐅᔅᑭᒡ ᑲᐸᒡ ᐛᐎᔭᑲᓄᒡ ᓇᔅᑲᐱ ᐊᓐᑕ 1643; ᐊᓐᑕ ᐃᔭᔨᒪᐅᒋᒪᐤ Jesuit André Richard ᑲᐃᔅᓱᒋᒪᑦ “Ounackkapiouek”, ᒥᔅᑯᒡ ᐊᑲ ᐅᒡ ᒥᔪᔅᒐᐃᒪᑲᓄᒡ ᐊᓐ ᐃᔭᔨᒪᐅᒋᒪᐤ ᑲᐛᐎᔭᑦ, ᒥᔅᑯᒡ ᐊᓐᑕ ᑲᑕᒡ ᒥᒐᑦ ᑕᑐᐎᒡ ᐃᔪᒡ ᑕᑎᐸᓐ ᑲᐎᒋᒡ ᐊᓐᑕ ᒋᐛᑎᓄᒡ Tadoussac ᑕᑐᓴᒃ ᑲᑎᑕᒡ᙮ ᐃᔨᒧᐅᓐ “ᓇᔅᑲᐱ” ᐅᔅᑭᒡ ᑲᔅᒐᐃᑕᑲᓄᒡ ᐊᓐᑕ 1733 ᐱᐳᓐ, ᐊᐅᑯᑦ ᓴᓯᑲᓐ ᑲᐃᑕᑲᓄᒡ 40 ᐎᓂᒋᑯᒪᐅᒡ ᑲᐃᑕᑎᓯᒡ ᑭᔭ ᑲᐎᒋᒡ ᐊᓐᑕ Lake Achouanipi ᓴᑲᐃᑭᓐ ᐊᑯᐛᓯᐱᔾ᙮ ᓴᓯᑲᓐ ᐸᐃᑯᑕᐤ ᐊᓐᑕ 1740 ᐱᐳᓐ, Joseph Isbister ᐅᒋᒪᐤ ᑕᐛᐅᒋᐛᐱᔪᐤ ᑲᒋᒥᑕᑦ ᐃᔅᑎᒪᐃᓐ, ᑲᐃᔅᒋᔄᑦ ᑲᐎᑎᒺᑲᓄᑦ ᐊᓐᑕ ᐃᔪᐛ ᐊᓱᒋᒪᑲᓄᐃᒋ “Annes-carps” ᐊᓐᑕ ᒋᐛᑎᓄᒡ ᐛᐱᓄᑕᒡ ᐃᑕᐅᓂᒡ Richmond Gulf᙮ ᐊᓐᑕ ᒥᒐᑦ ᑕᑎᐳᓇ ᑲᒋᐱᐃᒡ ᒥᓄᐛᒡ ᑲᐃᔅ ᐎᒋᒪᑲᓄᐊᒡ “ᓇᔅᑯᐱᔾ Nascopie” ᑭᔭ “ᓇᔅᑲᐱ Nascappe”᙮ ᐊᓐᑕ ᒥᒐᑦ ᑕᑎᐳᓇ, 1790 ᐱᐳᓐ ᑲᐃᑎᔅᑕᒡ, ᑕᑐᐎᒡ ᑲᓂᔅᑯᐛᒡ ᐃᔭᐃᒪᐅᒋᒪᐅᒡ Moravian Missionaries ᑲᐃᓯᒋᑕᐱᒪᒡ ᐃᔪᒡ ᐛᒋᒡ ᐊᓐᑕ ᐊᑎᒪᐱᓯᒧᒡ ᐊᓐᑕ ᐃᑕᐅᓂᒡ Okak ᐊᓱᐎᒋᒪᑲᓄᒡ ᓇᔅᑯᐱᔅ “Nascopies”᙮ ᐊᓐᒡ ᓇᔅᑲᐱ ᐊᓐᑕ ᐃᔭᐃᒪᐅᓂᔪᐤ ᑲᓂᔅᑲᒡ ᑲᑭᔭᓴᐤ ᐃᔭᔨᒪᐅᓂᔪᐤ, ᑭᔭ ᐊᔅᑯ ᐊᓇᓴᒡ᙮ ᐊᓐᑕ ᔭᐱᒡ ᐃᔪᐤ ᐃᔨᒧᐅᓐ ᔭᐱᒋᑕᒡ, ᐊᓯᔨᒥᒡ ᐊᑲᑭᔭᓴᐅᐃᒧᐅᓂᔪᐤ, ᐊᓐᑕ ᐸᐃᑯᑕᐤ ᐊᓯᔨᒥᒡ ᐛᓴᔪᐃᔪᐛ ᐎᑲᓂᓯᐛᐛ᙮ ᐊᓐᒡ ᐛᓴᐎᔪᒡ ᐊᓐᑕ ᐛᒥᔅᑎᑯᓯᔪᐃᔭᔨᒪᓂᔪᐤ ᐊᐱᒋᑕᒡ, ᐊᓐᑕ ᐃᔪᐤ ᐃᔨᒧᐅᓂᔪᐤ ᔭᐱᒋᑕᒡ ᑭᔭ ᐛᒥᔅᑎᓯᔪᐃᒧᐅᓂᔪᐤ ᙮ ᐊᓐᒡ ᐛᓴᐎᔪᒡ ᑐᐎᔅ ᐊᒥᒐᑎᑦ ᐃᔅᐱᔅ ᓇᔅᑲᐱ ᐃᔪᐛ᙮

ᐊᓐᑕ ᐱᐳᓇ 1831 ᓂᑲᓄᒡ ᐊᓐᑕ ᓴᓯᑲᓐ ᐅᔅᑭᒡ ᑲᓂᔅᑯᐛᑲᓄᒡ ᓇᔅᑲᐱ ᑭᔭ ᐊᓂᔭ ᐅᒋᒪᐛ ᑕᐛᐅᒋᐛᐱᔪᐤ Hudson’s Bay Company ᑲᒋᒥᑎᒥᒋ ᐊᓐᑕ Old Fort Chimo ᑈᑦ ᒐᐃᒧ᙮

ᐊᑲ ᐅᒡ ᒥᔪᑯᑕᒡ ᐊᓱᐎᒐᐅᑐᒡ ᐊᓐᒡ ᓇᔅᑲᐱ ᑭᔭ ᐅᒋᒪᐛ ᑕᐛᐅᒋᐛᐱᔪᐤ Hudson’s Bay Company᙮ ᑲᔭᐃᒥᓂᒡ ᐊᓐᑕ ᐅᔅᑲᒡ ᒪᓂᔪᐅᓐ ᒐᒋ ᑕᐛᒐᒡ ᓇᔅᑲᐱ ᒧᔭᒻ ᐛᐱᔅᑕᓇ ᐊᓐᑕ ᐊᐳᓂᒡ, ᐊᓐᑕ ᐊᓐᑐᐅᒡ ᑭᔅᑭᓐ ᐱᐳᓇ, ᐅᓴᒻ ᐊᓐᑕ ᐛᐱᔅᑕᓐ ᐊᔅᐱᑎᑦ ᐊᑎᐸᐛᑲᓄᑦ ᐊᓐᑕ ᐊᔅᑕᐃᑕᒂᒡ ᒐᒋ ᐱᒋᑕᑲᓄᒡ ᒥᒋᒻ᙮ ᑲᐃᓯᓇᒂᒡ, ᐊᑲ ᓱᒐᐃᒪᑲᓄᒡ ᓇᔅᑲᐱ ᓇᓐᑎᒻ ᒐᒋ ᑕᐛᒐᒡ ᒪᓂᐅᓇ ᐊᓐᑕ ᑲᐃᑕᐃᑕᒡ ᑕᐛᐅᒋᐛᑉ, ᑭᔭ ᐊᓐᑕ ᑲᐃᓯᒋᑕᐱᒪᑦ ᓇᔅᑲᐱ ᐊᒋᑎᒥᒋ ᑭᔭ ᒪᒃ ᐊᑲ ᓱᒐᐃᑕᑯᓯᒋ ᓇᔅᑲᐱ᙮

ᐊᓐᑕ 1945 ᐱᐳᓐ ᐊᒋᒪᑲᓄᒡ ᐊᐛᓐᒋ ᐊᑕᑎᓯᒡ (ᐊᓐᑕ ᓇᐱᑥᐤ) ᒪᒧ ᐃᓄᐤ ᑲᐃᑕᑎᓯᒡ ᐊᓐᑕ ᓇᐱᑥᐤ (ᐊᓂᓱᐎᒋᒡ ᐛᓴᐎᔪᒡ ᑭᔭ ᓇᔅᑲᐱ) ᑲᐃᑕᑎᓯᒡ 100 ᐊᓐᑕ ᐅᒋᒪᔅᒋᒡ, 33 ᐊᓐᑕ ᓇᐃᓐ ᑭᔭ 137 ᐊᓐᑕ ᓯᓴᓯᒡ (270 ᒪᒧ ᑭᔭ ᑲᐃᔅᐱᐱᒡ 2,000 ᒐᓯᐱᔪᐤ)᙮ ᐊᓐᑕ ᐅᑕᒡ ᑲᐃᑕᑎᓯᒡ 1935 ᐱᐳᓐ ᒥᑯ ᑲᒋᒪᑲᓄᒡ ᐃᔪᒡ ᐊᓐᑕ ᐅᒋᒪᔅᒋᒡ᙮ ᐱᔅᒐ ᒪᔅᑕᔾ ᐅᑎᓯᓂᑲᓱᐅᓄᐛᐛ ᑲᒋᒪᑲᓄᒡ ᑲᔅᑎᒋᒪᑲᓄᒡ Rich, Michimagaua, Mishimapu ᑭᔭ Pokue᙮ ᐱᔅᒐ ᐃᓄᐤ ᐊᓐᑕ ᓇᐱᑥᐤ ᐊᑲ ᐅᒋᑲᓄᐛᐃᑕᒡ ᒪᔅᑕᔾ ᐅᑎᓯᓂᑲᓱᐅᓄᐛᐛ ᐸᑐᔅ ᐊᓐᑕ ᑲᒋ ᑎᒂᒡ ᒋᓴᐅᒋᒪᑲᓐ ᐊᓐᑕ 1949 ᐱᐳᓐ᙮ ᐊᓐᒡ ᐃᓄᐤ ᐊᑲ ᐅᒡ ᑲᓄᐛᐃᑕᒡ ᒥᒋᐛᐸ ᒥᔅᑯᒡ ᐃᔪᐤ ᒥᒋᐛᐱᒡ ᑲᑕᒡ ᐊᓐᑕ ᓯᓴᓯᑦ, ᓇᐃᓐ ᑭᔭ ᐅᒋᒪᔅᒋᒡ (ᓄᑎᒻ ᐃᔅᒋᒪᐅᒡ ᑲᐎᒋᒡ) ᒪᒂᒡ ᑲᓂᐱᓂᒡ᙮

ᑲᑎᐱᓇᓄᒡ

ᐊᓐᑕ ᑲᐃᔅᐱᐃᒡ 1831 ᑭᔭ 1956 ᐱᐳᓇ, ᐊᓐᒡ ᓇᔅᑲᐱ ᒥᒐᑥᐤ ᑲᑕᔭᑲᓄᒡ, ᓄᑎᒻ ᐊᓐᑕ ᐎᐃᐛᐤ ᐊᑲ ᐅᒡ ᐃᓯᓐᑐᐛᐃᑕᒡ ᑭᔭ ᒻᑲ ᒐᒋ ᓂᔅᑯᒧᐅᒡ, ᒥᔅᑯᒡ ᐊᓐᒡ ᐅᒋᒪᐅᒡ ᑕᐛᐅᒋᐱᒡ, ᐊᓐᑕ ᑕᑥᐤ ᑲᑎᐱᓇᓄᒡ:

1842 – ᑈᑦ ᒐᐃᒧ ᐊᓐᑕ ᑈᑦ ᓇᔅᑯᐱᔾ Fort Chimo to Fort Nascopie

1870 – ᑈᑦ ᓇᔅᑯᐱᔾ ᐊᓐᑕ ᑈᑦ ᒐᐃᒧ Fort Nascopie to Fort Chimo

1915 – ᑈᑦ ᒐᐃᒧ ᐊᓐᑕ ᑈᓐ ᒪᑲᓐᒐᔾ ᐛᔅᑲᐃᑭᓂᔅ Fort Chimo to Fort McKenzie

1948 – ᑈᑦ ᒪᑲᓐᒐᔾ ᐛᔅᑲᐃᑭᓂᔅ ᐊᓐᑕ ᑈᑦ ᒐᐃᒧ Fort McKenzie to Fort Chimo

1956 – ᑈᑦ ᒐᐃᒧ ᐊᓐᑕ ᓴᐱᐸᐤ Fort Chimo to Schefferville

ᒥᒐᑦ ᐃᔨᒧᐅᓐ ᑲᒥᓯᑕᐃᑲᓄᒋ ᐊᓐᒡ ᐅᒋᒪᐛ ᑕᐛᐅᒋᐛᐱᔪᐤ Hudson’s Bay Company ᑲᔭᑕᔭᒡ ᓇᔅᑲᐱ ᐊᓐᑕ ᐊᑎᑕᑯᓂᒋ ᑕᐛᐅᒋᐛᐸ ᐅᓴᒻ ᐊᓯᑕᐛᒐᒡ ᒐᒂᔪᐤ, ᑭᔭ ᐊᑲ ᐅᒡ ᐊᔭᐃᒪᐃᑎᒥᑯᒡ ᐊᓐᑕ ᐃᑕᐅᓂᒡ ᑕᐊᓐ ᐊᒋᒥᑕᐃᒡ ᑕᐛᐅᒋᐛᐸ ᒐᒋ ᑎᑯᓂᒡ ᓇᔅᑲᐱ ᒐᒋ ᐊᓐᑐᐅᒡ ᑭᔭ ᐊᓐᑐᐅᓂᒪᓴᒡ ᑭᔭ ᒥᒋᒥᔪᐤ ᒐᒋ ᐊᐱᒋᑕᒡ ᑭᔭ ᒪᓂᐅᓇ ᑲᓇᑐᐛᐸᑕᒡ ᑕᐛᐅᒋᐛᑉ᙮ ᐊᓐᑕ ᑲᐃᔅᐱᐃᒡ, ᐅᒋᒪᐅᒡ, ᐊᑲ ᐅᒡ ᓇᐊᐃᒪᒡ ᓇᔅᑲᐱ ᐅᓴᒻ ᐊᑲ ᓱᒃ ᐅᒡ ᒪᓂᔪᐅᒡ ᑭᔭ ᑲᓂᑲᓂᒺᒡ ᐸᔅᒋᑭᓐ ᓯᓂᔭ ᒐᐃᔅ ᓄᑕᐱᐃᒋ ᒐᒋ ᐊᓐᑐᐅᒡ, ᐊᓐᑕ ᑲᑎᒂᒡ ᒐᒋ ᒥᒐᑦ ᐊᐳᓂᐱᒪᑎᓯᒡ ᐅᓴᒻ ᐊᓱᐎᔨᓇᓄᒡ᙮

20th ᑕᑎᐳᓇ

ᐊᓐᑕ ᐊᔅᑯ 1940 ᐱᐳᓐ ᑲᐱᒧᑯᑕᒡ, ᑲᓐᑐᐛᐃᑕᑲᓄᒡ ᒐᒋ ᐊᑐᑕᑲᓄᒡ ᑲᓐᑐᒪᓂᓇᓄᒡ, ᑲᐃᔅᐱᐱᒡ ᓂᐳᐅᓐ ᑭᔭ ᐊᐧᑯᓱᐅᓐ ᑲᐃᔅᐱᔅ ᐊᑕᑦ ᑲᐛᐱᓯᑦ, ᑭᔭ ᑲᒪᑕᐃᑕᒂᒡ ᐊᓐᑕ ᑲᔭᓯᐱᐃᑦ ᐊᑕᑎᓯᑦ ᒧᓱᐛᐤ ᓯᐱᔾ ᐊᑎᑯᒡ ᑭᔭ ᐊᑲ ᐅᒡ ᒥᒐᑎᑦ ᓇᔅᑲᐱ ᐅᓴᒻ ᑲᐃᓯᓇᒂᒡ ᐊᓐᑕ ᑲᒪᑕᐃᑕᒡ ᐅᐱᒪᑎᓯᔪᐅᓄᐛᒡ᙮

ᓇᔅᑲᐱ ᑲᑲᔅᑎᓇᒡ “ᐛᐎᒋᑐᓂᔪᐤ” ᐊᓐᑕ ᐊᑐᐛ ᒋᓴᐅᒋᒪᑲᓇ ᐊᓐᑕ ᑲᐃᔎᐱᐃᒡ 19th century ᑕᑎᐳᓇ, ᒥᔅᑯᒡ ᐅᔅᑲᒡ ᑲᓂᔅᑐᐛᐱᒧᑯᒡ ᐊᑐᐛ ᒋᓴᐅᒋᒪᑲᓇ ᐊᓐᑕ 1949 ᐱᐳᓐ, Colonel H.M. Jones, ᐅᒋᒪᐤ ᑯᐸᓇᔅ ᑲᐛᐎᒋᐛᓄᒡ ᐊᓐᑕ ᐊᑐᐛ ᑭᔭ M. Larivière ᐊᓐᑕ ᐃᑕᐅᓂᒡ Abitibi ᐃᔪᐛ ᑲᐛᐎᒐᑦ ᑲᐃᑐᑕᒡ ᐊᓐᑕ ᑈᑦ ᒐᐃᒧ ᑭᔭ ᑲᔭᔅᑯᔅᑕᒡ ᒐᐃᔅ ᐛᐎᒋᐛᒡ ᓇᔅᑲᐱ᙮

ᐊᓐᑕ ᐊᔅᑯ 1950 ᐱᐳᓐ, ᓇᔅᑲᐱ ᐊᐱᑐ ᐊᓐᑕ ᑲᐱᐧᑯᒋᑕᒡ ᒐᒋ ᑲᐤ ᒥᔪᑕᐃᓱᒡ ᐊᓐᑕ ᑈᑦ ᒪᑲᓐᒐᔾ ᐛᔅᑲᐃᑭᓂᔅ, ᐊᓐᑕ ᓴᔅ ᐊᓐᑕ ᑲᐅᒡ ᐱᑲᔅᒋᑎᓱᒡ 1916 ᐃᔅᐱᔅ 1948 ᐱᐳᓐᒻ ᑭᔭ ᑲᐤ ᒐᒋ ᐊᓐᑐᐅᒡ, ᐊᓐᑐᓂᒪᓴᒡ, ᑭᔭ ᑕᐛᒐᒡ ᒪᓂᔪᐅᓂᔪᐤ ᒐᒋ ᐅᒡ ᐱᑲᔅᒋᑎᓱᒡ ᒐᒋ ᐱᒪᑎᓯᒡ᙮ ᐊᑲ ᓱᒃ ᐊᓐᑕ ᓴᔅ ᒋᐃᑐᑕᑎᓱᒡ ᒐᒋ ᐊᓐᑐᐅᒡ ᐊᓐᑕᐱᒡ ᒐᒂᔪᐤ ᒐᒋ ᐊᓐᑐᐅᒡ ᑭᔭ ᐊᔭᔨᒥᓂᒡ ᒐᒂᔪᐤ, ᐊᓐᑕ ᔭᐱᒡ ᑲᒥᓴᒡ ᐊᐧᑯᓱᐅᓐ ᑭᔭ ᑎᐸᓐ ᐊᐧᑯᓱᐅᓐ, ᐊᓐᑕ ᑲᓐᑐᐛᐃᑕᒂᒡ ᑲᐤ ᒐᒋ ᐊᑐᒐᒡ ᑈᓐ ᒐᐃᒧ ᑲᒋ ᐊᓐᑕ ᓂᓱ ᐱᐳᓇ᙮

ᑲᑎᐱᓇᓄᒡ ᓴᐱᐸᐤ

ᐊᑲ ᐅᒡ ᓂᔅᑐᑕᒂᒡ ᑯᒐᒂᓐ ᑲᐅᒡ ᐃᓯᓇᒂᒡ, ᐊᓐᒡ ᓄᑎᒻ ᓇᔅᑲᐱ ᑈᑦ ᒐᐃᒧ ᑲᔭᑕᔭᑲᓄᒡ ᐊᓐᑕ ᓴᐱᐸᐤ ᐊᓐᑕ ᑲᓄᑎᓯᓇᓄᒡ ᐊᑐᔅᒐᐅᓐ ᑲᑎᒂᒡ ᓴᐱᐸᐤ ᐊᓐᑕ 1956 ᐱᐳᓐ᙮ ᓂᓱ ᒐᒂᐃᐛ ᑲᒋᑕᐸᑕᑲᓄᒋ ᐊᓐᑕ ᐊᑎᒂᒋ ᓂᓱ ᑲᔅᑯᑎᒪᑐᒋᐛᐸ ᑲᐅᒡ ᐃᑕᐃᒪᑲᓄᒡ ᒐᒋ ᐊᑕᔭᑲᓄᒡ᙮ ᐸᐃᒄ ᒐᒂᓐ ᑲᐃᑎᓱᒪᑲᓄᒡ ᒐᒋ ᐊᑕᔭᑲᓄᒡ ᐊᓂᔭ ᐃᐅᐤ ᑲᒐᐅᒋᒪᑐᔅᒐᐃᒋ, ᒪᒂᒡ ᐊᓐᑕ ᑯᑎᑲᒡ ᑲᐃᑕᐃᑕᒡ ᐎᐃᐛᐤ ᓇᔅᑲᐱ ᑲᓐᑐᐛᐃᑕᒡ ᒐᒋ ᐊᑕᔭᑲᓄᒡ ᐅᓴᒻ ᐊᓐᑕ ᐊᑐᔅᒐᐅᓂᔪᐤ ᒐᒋ ᒥᔅᑲᒡ, ᒥᒋᐛᐸ, ᐎᒐᑲᓄᒡ ᐊᐧᑯᓱᐅᓂᒡ, ᐊᔅᑯᑎᒪᑐᐅᓐ ᐊᑎᑯᓂᒡ ᒐᒋ ᐊᐱᒋᑎᒥᒋ ᐅᑐᐛᔅᒋᒧᐛᐛ᙮.

ᐊᑎᓱ ᑲᒐᐅᒋᒪᑐᔅᒐᒡ ᑲᔅᒐᐃᑕᒡ ᐊᓐᑕ ᓇᔅᑲᐱ ᐛᑕᔭᑲᓄᐃᒋ ᐊᓐᑕ ᑈᑦ ᒐᐃᒧ ᐃᔅᐱᔅ ᓴᐱᐸᐤ ᑭᔭ ᐎᐃᐛᐤ ᑲᐛᔅᑕᒡ ᒐᒋ ᐊᑕᔭᑲᓄᐃᒋ, ᑲᐃᓯᓇᑯᓂᒡ ᐊᑲ ᐅᔅᑐᑕᑲᓄᐃᒡ ᒐᒂᔪᐤ ᑭᔭ ᒐᒋ ᔭᔅᑯᔅᑕᑲᓄᒡ ᒐᒂᓐ ᒐᑎᑯᓯᓂᒡ, ᒪᒂᒡ ᔭᐱᒡ ᒐᒋ ᐎᑎᒺᑲᓄᒡ ᑯᐸᓇᓴᒡ ᑲᓄᑎᓯᓇᒡ Iron Ore Company of Canada (“IOCC”) ᐊᑲᓇᐤ ᑭᔭ ᒪᒃ ᐊᓂᔭ ᐅᑕᓇᐤ ᓴᐱᐸᐤ ᐅᒋᒪᐅᓂᒡ᙮

ᐊᓐᒡ ᓇᔅᑲᐱ ᐃᔪᒡ ᑲᓂᑲᑕᒡ ᑈᑦ ᒐᐃᒧ ᑲᐱᒧᑕᒡ ᒐᒋ ᐊᑐᑕᒡ 400 ᑲᐃᔅᐱᓴᒡ ᐱᒧᑕᒡ mile (640 km) ᐃᔅᐱᔅ ᓴᐱᐸᐤ᙮ ᐊᓐᑕ ᑲᑎᑯᓯᐱᒡ ᐛᒂᒡ ᓴᑲᐃᑭᓂᒡ 70 ᑲᐃᔅᐱᓴᒡ miles (113 km) ᐃᔅᐱᔅ ᐊᓐᑕ ᒋᐛᑎᓄᒡ ᓴᐱᐸᐤ, ᐱᔅᒐ ᓴᔅ ᑲᒋᐧᑭᒪᑕᒡ ᑭᔭ ᑲᑯᐧᑭᑕᐅᓐ ᑲᑕᒡ᙮

ᑲᑐᑕᑲᓄᒡ ᒐᒋ ᐛᐎᒐᑲᓄᒡ, ᒥᔅᑯᒡ ᐊᓐᑕ ᒥᒋᐛᐸ ᑲᓱᐛᐱᒧᑯᒡ ᐊᓂᔭ ᒥᒋᐛᐱᔅᒐ ᑲᐃᓯᓇᑯᓂᒋ ᐊᓐᑕ ᐎᐃᐛᐤ ᑲᒪᓂᑲᓂᓱᒡ ᐊᓐᑕ ᒥᒋᒪ Pearce Lake ᓴᑲᐃᑭᓂᒡ ᐊᓐᑕ ᐃᔅᑯᑕᐅᑕᐸᓐ ᒪᔅᑲᓇᒡ ᐊᐸᓱᓇᑯᓂᒡ, ᐊᔅᑯᐱᐃᒡ ᒐᒂᔪᐤ ᒐᒋ ᐊᐱᒋᑕᒡ ᑲᒥᔭᑲᓄᒡ ᑭᔭ ᐱᔅᒐ ᒐᒂᔪᐤ ᒐᒥᔭᑲᓄᒡ᙮ ᑲᐃᔅᐱᐃᒡ, ᐊᓐᑕ 1957 ᐱᐳᓐ, ᐊᓐᑕ ᑲᐃᓯᓇᒂᒡ ᐊᓐ ᓂᐱᔾ ᐊᓐᑕ ᓴᑲᐃᑭᓂᒡ ᑲᐎᓇᑯᒧᑦ, ᐅᑕᓇᐤ ᑯᐸᓇᓴᒡ ᑲᔭᑕᔭᒡ ᐊᓐᑕ ᒥᒋᒪ ᒠᓐ ᓇᒃ ᓴᑲᐃᑭᓂᒡ ᒥᒋᒪ ᐊᔅᒋᔪᐤ, ᐊᓐᑕ ᓇᐤ ᐊᔅᐱᓯᓇᑯᓂᒡ 4 miles (6 km) ᒋᐛᑎᓄᒡ ᐛᐱᓄᑕᒡ ᐊᓐᑕ ᓴᐱᐸᐤ, ᐊᓐᑕ ᑲᐎᒋᒡ ᐊᑲ ᐅᔅᑎᑯᓂᒡ ᐅᑕᐃᐸᓂᔪᐤ ᑭᔭ ᒐᒋ ᐛᔅᑐᐛᒡ ᐛᔅᑕᐱᒪᑲᓇ, ᑭᔭ ᐊᓐᑕ ᑲᓱᒐᐃᒧᒡ ᒐᒋ ᑎᑯᓯᓂᒡ ᓴᐱᐸᐤ ᐊᑲ ᐅᔅᑎᑯᓂᒡ ᑲᔅᑯᑎᒪᑐᒋᐱᔪᐤ ᒐᒋ ᐃᑐᑕᐃᒋ ᐅᑐᐛᔅᒋᒧᐛᐛ ᑭᔭ ᐊᐧᑯᓯᔪᒋᐛᐱᔪᐤ᙮

ᐊᓐᒡ ᓇᔅᑲᐱ ᒪᒧ ᑲᑎᑎᔭᑲᓄᒡ ᐊᓐᑕ ᒋᓴᓯᔪᔅᒋᒡ ᓇᒃ ᒠᓐ ᐊᓂᔭ ᐛᓴᐎᔪᐛ, ᐊᓐᑕ ᐛᓴᒡ ᑲᐸᒡ ᐊᑕᔭᑲᓄᐃᒋ ᐛᐃᔅᐱᔅᒋᓴ ᐊᓐᑕ ᓴᐱᐸᐤ ᐊᓐᑕ ᑲᒋᔅᑕᑲᓄᐃᒡ ᐃᔅᑯᑕᐅᑕᐸᓐ ᒪᔅᑲᓄᔪᐤ ᐊᓐᑕ 1950 ᐱᐳᓇ ᑲᐱᒧᑯᑕᐃᒡ᙮

ᐊᐅᑯᑦ, ᐊᓐᑕ ᓇᔅᑲᐱ ᑲᐎᒋᐧᑲᓱᒡ ᑲᒪᓂᑲᓂᑎᓱᒡ ᐎᒍᐛᐛ, ᒥᔅᑯᒡ ᐊᓐᑕ 1962 ᐱᐳᓐ ᐃᔪᐤ ᑲᒐᐅᒋᒪᑐᔅᒐᑦ ᑲᒪᓂᑯᐛᑦ ᓂᔅᑐᔪᐤ ᒥᒋᐛᐸ, ᑭᔭ ᓇᐤ ᒥᒋᐛᐸ ᑲᒋᒥᑕᑲᓄᒋ ᑲᐃᔅᐱᑕᐃᑕᑯᓂᒋ $5,000 ᐸᐸᐃᒄ᙮

ᑲᔭᑎᒥᓇᓄᒡ ᒪᑎᒪᑯᔅ ᐃᔪᔅᒋᒡ

ᐊᓐᑕ 1969 ᐱᐳᓐ, ᐃᔪᐤ ᑲᒐᐅᒋᒪᑐᔅᒐᑦ ᐊᔅᒋᔪᐤ ᑲᑲᔅᑎᓇᑦ ᐊᓂᔭ ᓴᐱᐸᐤ ᐅᑕᓇᔪᐤ, ᑲᒥᓴᑯᓂᒡ, 39-acre (160,000 m2) ᐛᔅᑲ ᐊᔅᐱᓴᐃᒡ ᐊᓐᑕ ᒋᐛᑎᓄᒡ ᐅᑕᓇᔪᐤ ᐊᓐᑕ ᒥᒋᒪ Pearce Lake ᓴᑲᐃᑭᓂᔪᐤ᙮ ᐊᓐᑕ 1972 ᐱᐳᓐ, 43 ᒥᒋᐛᐸ ᐊᑕᐱᑎᓂᒋ ᑲᒋᒥᑎᒺᑲᓄᒡ ᓇᔅᑲᐱ ᑭᔭ 63 ᐛᓴᐎᔪᒡ ᑲᒋᒥᑎᒺᑲᓄᒡ ᐊᑕᐱᑎᓂᒋ ᒥᒋᐛᐸ ᑭᔭ ᐱᔅᒐ ᓇᔅᑲᐱ ᑭᔭ ᐛᓴᐎᔪᒡ ᑲᔭᑎᐱᒡ ᐊᓄᒡ ᐊᓱᐎᒍᑕᑲᓄᒡ ᒪᑎᒪᑯᔅ ᐃᔪᔅᒋᔾ᙮

ᐊᓐᑕ ᐅᔅᑭᒡ ᐊᓐᑕ ᑕᑐᐎᒡ ᑲᑕᔭᑲᓄᒡ, ᓇᔅᑲᐱ ᑲᓂᔅᑯᐛᑲᓄᒡ ᐊᓐᑕ ᒐᑲᓄᐛᐃᑕᒡ ᒥᒋᐛᐱᔪᐤ᙮ ᐃᔪᐤ ᑲᒐᐅᒋᒪᑐᔅᒐᑦ ᑲᐃᑎᓴᐛᑦ ᑯᐸᓇᓴ ᒐᒋ ᐛᐎᑎᒥᒋ ᓇᔅᑲᐱ ᐊᓂᔭ ᐊᐅᔅᑲᒡ ᐃᔪᔅᒋᔾ, ᒥᓯᓇᐃᑭᓂᔪᐤ ᑲᐛᐸᑎᔭᑲᓄᒡ, ᒥᒋᐛᐸ ᑲᐃᓯᓇᑯᓂᔪᐤ, ᑲᐃᔅ ᐊᑐᔅᑲᔅᑕᑲᓄᐃᒡ ᒥᓯᓇᐃᑭᓂᔪᐤ ᒐᒋ ᐊᑐᑕᑲᓄᐃᒡ᙮ ᐊᓐᑕ ᑲᒋᑕᐸᑕᒡ ᓇᔅᑲᐱ ᐊᓐᑕ ᒐᐃᓯᓇᑯᓂᔪᐤ ᒥᒋᐛᐱᔪᐤ ᒐᑲᔅᑎᓇᒡ᙮ ᐅᓴᒻ ᓱᓇᔭᐤ ᐊᒋᑕᐸᑕᑲᓄᒡ ᐊᓐᑕ ᐃᔪᐤ ᒋᓴᐅᒋᒪᑲᓂᒡ ᑲᓐᑐᐛᐃᑕᒡ ᒐᒋ ᑕᑎᐸᓐ ᐊᒪᒧᔅᑕᑲᓄᒋ ᒥᒋᐛᐸ ᒐᒋ ᒋᒥᑕᑲᓄᒋ ᐊᑕᐸᑭᔅᑕᐃᒋ, ᓇᔅᑲᐱ ᑲᓐᑐᐛᐃᑕᒡ ᑕᑎᐸᓐ ᒥᒋᐛᐸ ᒐᒋ ᒋᒥᑕᑲᓄᒋ᙮ ᐊᓐᑕ ᑲᐃᓯᓇᒂᒡ, ᐃᔪᒋᒪᑲᓐᒡ ᑲᓯᒋᒪᑲᓄᒡ ᒐᒋ ᐅᑎᓇᒡ ᐃᔪᐤ ᑲᒐᐅᒋᒪᑐᔅᒐᐃᒋ ᑲᐎᓯᐱᒧᑕᐃᒋ ᑭᔭ ᓇᔅᑲᐱ ᑲᓇᐊᐃᑕᒡ, ᒥᔅᑯᒡ ᒐᐊᑲ ᐸᑕᒂᒡ ᐊᓐᑕ ᒂᔅᑕᒐ ᐊᐛᓐ ᐛᒋᑦ, ᒥᔅᑯᒡ ᐊᑲ ᐅᒡ ᐃᓯᓇᑯᑕᑲᓄᐃᒡ᙮

ᒥᒐᑦ ᒐᒂᔪᐤ ᓇᒪ ᐅᒡ ᓇᓴᒧᒡ ᐊᓐᒡ ᐃᔪᐤ ᑲᒐᐅᒋᒪᑐᔅᒐᒡ ᒋᐸᐃᓯᓇᑯᓂᐱᓂ ᒥᒋᐛᐸ᙮ ᐊᓐᑕ ᔭᐱᒡ ᑲᐃᑕᑲᓄᒡ ᒐᒂᔪᐤ ᒐᐎᑐᑕᑲᓄᐃᒡ ᓂᓱ ᒐᒂᐃᐛ ᐊᒋᑕᐸᑕᑲᓄᐃᒋ ᐊᑲ ᐅᔅᑐᑕᑲᓄᐃᒡ ᒧᔭᒻ ᒥᒋᐛᐸ ᑲᐎᓯᓇᑯᑕᑲᓄᐃᒋ ᑭᔭ ᐛᔅᑲ ᐊᔅᒋᔾ ᒐᒋ ᒥᔪᓇᑯᑕᑲᓄᒡ ᓇᒪ ᐅᒋ ᑐᑕᑭᓄᐤ᙮ ᐃᔪᐤ ᑲᒐᐅᒋᒪᑐᔅᒐᒡ ᒥᓯᓇᐃᑭᓂᔪᐤ ᑲᐛᐸᑎᐛᒡ ᐊᔅᒋᔾ ᒐᐃᐤ ᒥᔪᓇᑯᑕᑲᓄᐤ ᑭᔭ ᒐᒋ ᓂᑕᐅᒐᑲᓄᒡ ᒥᔅᑎᑯᒡ ᑭᔭ ᐛᔅᑲ ᒐᒋ ᒥᔪᓇᒂᒡ ᐃᔪᔅᒋᔾ᙮

ᑲᐃᔅᐱᐃᒡ ᒐᒂᓐ ᐊᓯᑲᔅᑕᐅᑯᒡ ᐊᐛᓐᒋ ᐊᓐᑕ ᐊᑐᔅᑲᔅᑕᒡ ᐃᔪᐤ ᒋᓴᐅᒋᒪᑲᓂᒡ ᒥᔅᑯᒡ ᐊᓐᒡ ᑲᒪᑕᐃᑕᒡ ᓇᔅᑲᐱ ᐃᔪᒡ ᐊᓐᑕ ᒪᒧ ᓴᔅ ᑲᐎᐅᒋᑐᔅᒐᒪᒡ ᐃᔪᐤ ᑲᒐᐅᒋᒪᑐᔅᒐᐃᒋ ᑭᔭ ᐊᓐᑕ ᐊᑲ ᐅᓐᒋᔅᒋᑕᒡ ᐊᓂᔭ ᑲᑐᑕᑯᒡ ᐅᒋᒪᐤ ᑕᐛᐅᒋᐛᐱᒡ Hudson Bay Company᙮ ᐊᑲ ᐅᒡ ᒥᔅᑲᑕᐃᑕᑲᓄᒡ ᑭᔭ ᐊᔅᑯ ᐊᓄᒡ ᐎᔭᐎᑕᑲᓄᒡ ᑲᐃᔅ ᒪᑕᐃᑕᒡ ᓇᔅᑲᐱ ᑭᔭ ᐊᔅᑯ ᐊᓂᔭ ᐊᔭᐱᑕᐃᑕᒡ ᓇᔅᑲᐱ ᑭᔭ ᐱᔅᒐ ᒐᒂᔪᐤ ᐊᔅᑕᐃᑕᒡ᙮

ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ

ᒐᒂᓐ ᑲᐃᔅᐱᐃᒡ ᐊᓐᑕ 1975 ᐱᐳᓐ ᑲᐃᑎᔅᑕᒡ ᐊᓐᑕ ᓴᐱᐸᐤ ᑲᓂᔅᑯᐛᑲᓄᒡ ᒋᒥᔅ ᐱ ᑕᒂᐃᑭᓐ Billy Diamond ᑭᔭ ᐃᔅᒋᒪᐤ Charlie Watt ᑭᔭ ᐊᓐᒡ ᓇᔅᑲᐱ ᑲᐃᑕᐃᑕᒡ ᒐᒋ ᐊᑐᔅᑲᔅᑕᒡ ᒪᒧ ᐊᓇᒋᐱᔅᑕᑐᓇᓄᐃᒡ ᐊᓂᔭ ᑲᒥᓯᓇᑕᐅᑎᓱᓇᓄᐃᒡ ᐊᓂᔭ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᓯᓇᐃᑭᓂᔪᐤ᙮

(“JBNQA”).

ᓇᔅᑲᐱ ᒪᒧ ᑲᒥᓯᓇᑕᐅᑎᓱᒡ ᓂᔅᑯᒧᐅᓂᔪᐤ NQIA ᐊᓐᑕ ᒐᒋ ᐛᐎᒐᑲᓄᒡ ᑲᐃᒥᒋ ᑭᔭ ᑯᑎᑲ ᑲᐛᐎᒐᐅᓯᒋ ᐊᓐᑕ ᒧᓂᔭᓂᒡ᙮ ᐊᓇ ᒐᒂᓐ ᑲᐛᑎᔅᑕᑲᓄᒡ ᐊᑲ ᐅᒡ ᐱᐧᑯᒋᑕᑭᓄᒡ ᒐᒂᓐ ᒥᔅᑯᒡ ᐊᓇ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ ᑲᒥᓯᓇᑕᐅᑎᓱᓇᓄᒡ ᐊᓐᑕ ᐱᓂᐎᐅᐱᓯᒻ 11,1975 ᑭᔭ ᐊᑲ ᐅᒋᔅᑎᒋᒪᑲᓄᒡ ᐊᓐᒡ ᓇᔅᑲᐱ ᐃᔪᒡ᙮

ᑲᒋᒪᒥᓯᓇᑕᐅᑎᓱᓇᓄᒡ ᐊᓇ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ ᐊᑯᑕ ᑲᔅᒐᐃᑕᑲᓄᒡ ᐊᓐᒡ ᐃᔅᒋᒪᐅᒡ ᑲᒥᔅᑎᓂᑐᐛᑕᒡ ᒐᒂᔪᐤ ᑭᔭ ᑲᐎᐱᑯᓴᐃᒧᒡ ᑭᔭ ᐊᑲ ᓱᑲ ᐎᔅᑎᒋᒪᒡ ᓇᔅᑲᐱ ᐃᔪᐛ, ᓇᔅᑲᐱ ᑯᐸᓇᓯᒡ ᑲᑲᔅᑎᓇᒡ ᐊᐛᐃᐛ ᒐᒋ ᐛᐎᒋᑯᒡ ᑭᔭ ᑎᐸᓐ ᑲᐃᔅ ᐱᒧᑕᒡ ᑭᔭ ᑲᑐᔅᑲᔅᑕᑎᓱᒡ᙮

ᐊᓐᒡ ᐊᐛᓐᒋ ᑲᒥᓯᓇᑕᐅᑎᓱᒡ ᐊᓂᔭ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓯᓇᐃᑭᓂᔪᐤ ᑲᔅᒐᐃᑕᒡ ᐊᑯᑕ ᐊᑐᒡ ᒋᑎᑯᓂᔪᐤ ᐅᑎᐸᐃᑎᒧᐅᓄᐛᐤ ᓇᔅᑲᐱ ᐊᓐᑕ ᐊᒋᑕᐸᑕᑲᓄᒡ ᐊᔅᒋᔭ ᑭᔭ ᐊᑯᑕ ᑲᐎᓯᐱᒧᑕᓄᒡ ᒐᒋ ᓇᒋᐱᔅᑕᑐᓇᓄᒡ ᐊᓐ ᐊᒋᑕᐸᑕᑲᓄᒡ ᐊᔅᒋᔭ ᑎᐸᐃᑎᒧᐅᓇ᙮

ᒥᔅᑯᒡ ᐊᓐᒡ ᓇᔅᑲᐱ ᐊᑲ ᓂᑕ ᐅᒡ ᑐᑕᒡ ᒥᓯᓇᐃᑭᓂᔪᐤ ᒐᒋ ᓇᓴᐊᒡ ᐊᓂᔭ ᑎᐸᐃᑎᒧᐅᓂᔪᐤ ᑭᔭ ᐊᓐᑕ ᒥᔅᑯᒡ ᑲᑐᑕᒡ ᐊᓂᔭ ᒥᓯᓇᐃᑭᓂᔪᐤ ᓇᔅᑲᐱ ᐊᐛᐎᔭᑲᓄᒡ ᐊᓂᔭ ᒥᓯᓇᐃᑭᓂᔪᐤ ᑲᑐᑕᒃ Alan Cooke ᑭᔭ ᐊᓐᒡ ᐊᐛᓐᒋ ᑲᒥᓯᓇᑕᐅᑎᓱᒡ ᐊᓂᔭ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓯᓇᐃᑭᓂᔪᐤ ᑲᑲᔅᑎᓇᒡ ᐊᓂᔭ ᐅᑎᐸᐃᑎᒧᐅᓄᐛᐤ ᑭᔭ ᓴᓯᑲᓐ ᓂᔅᑯᒧᐅᓂᔪᐤ ᑲᑐᑕᒡ ᐊᓂᔭ ᒪᒧ ᓇᔅᑲᐱ ᐃᔪᐛ ᐊᓐᑕ ᑲᓯᑯᓂᒡ 1977 ᐱᐳᓐ ᑲᐃᑎᔅᑕᐃᒡ ᒐᒋ ᒪᒧ ᓇᒋᐱᔅᑕᑐᓇᓄᒡ ᒐᒋ ᑐᑕᑲᓄᒡ ᓂᔅᑯᒧᐅᓐ ᐊᓐᑕ ᒧᔭᒻ ᑲᐃᓯᐱᒧᑕᓄᒡ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓯᓇᐃᑭᓐ᙮ ᐊᑯᑕ ᐊᓇ ᑲᑐᑕᑲᓄᒡ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ ᑭᔭ ᐊᓐᑕ ᑲᒥᓯᓇᑕᐅᑎᓱᓇᓄᒡ ᐅᒐᒥᑐᓇᓂᐱᓯᒺ 31,1978 ᐱᐳᓐ ᑲᐃᑎᔅᑕᒡ᙮

ᐊᓇ ᐊᑭᔅᑭᑎᔅᑕᒡ 20 ᐊᑎᔅᑕᒡ ᐊᓐᑕ ᓂᔅᑯᒧᐅᓯᓇᐃᑭᓂᒡ ᑲᒥᔭᑲᓄᒡ ᓇᔅᑲᐱ ᒐᒋ ᑎᐸᓐ ᐊᓐᑕ ᐊᑎᐱᒡ᙮

ᑲᑎᐱᓇᓄᒡ ᑲᐛᐛᒋᑲᒪᒡ

1978 ᐃᔅᐱᔅ 1980 ᐱᐳᓐ ᑲᐃᑎᔅᑕᒡ ᑲᓇᑐᔅᒐᐃᑕᑲᓄᒡ ᐊᑐᔅᒐᐅᓐ ᑲᐃᔅ ᒋᒥᑕᑲᓄᒋ ᑲᑐᔅᑲᔅᑕᑲᓄᒡ ᐊᓐᑕ ᓇᔅᑲᐱ ᒐᐃᔅ ᐊᑎᐱᒡ᙮ ᐅᒐᒥᑐᓇᓂᐱᓯᒺ 31,1980 ᐊᓐᒡ ᓇᔅᑲᐱ ᑲᓇᐊᐃᑕᒡ ᒐᒋ ᐊᑎᐱᒡ ᐊᓐᑕ ᑲᐛᐛᒋᑲᒪᓯᒡ ᑲᐃᓯᓂᑲᑕᐃᒡ ᐃᔪᔅᒋᔪᐤ ᓇᔅᑲᐱ ᑲᒋᒥᑕᒡ 1980 ᐃᔅᐱᔅ 1983 ᐱᐳᓐ ᑲᐃᑎᔅᑕᐃᒡ᙮ ᑲᐛᑎᔅᑕᑲᓄᒡ ᑭᔭ ᐊᓐᑕ ᒐᒋᒥᑕᑲᓄᒡ ᐃᔪᔅᒋᔾ ᐊᑯᑕ ᒐᐛᐎᒋᑯᒡ ᓇᔅᑲᐱ ᒐᒋ ᔅᑯᑎᒧᐛᑲᓄᒡ ᑕᑐᐎᒡ ᐊᓯᓇᑯᓂᒡ ᐊᑐᔅᒐᐅᓂᔪᐤ ᑭᔭ ᐊᒪᓂᒐᓄᐎᒡ᙮

1981 ᐃᔅᐱᔅ 1984 ᐱᐳᓐ ᑲᐃᑎᔅᑕᒡ ᐊᓇ ᒐᒋ ᑎᐸᐃᒥᑎᓱᓇᓄᒡ ᒋᓴᐅᒋᒪᑲᓂᒡ ᐊᓐᒡ ᑲᐃᔅᒋᔄᒡ ᐊᑐᐛ ᒋᓴᐅᒋᒪᑲᓂᒡ ᒐᑎᑯᓂᒡ ᐊᓐᑕ ᐊᑭᔅᑭᑎᔅᑕᐃᒡ 7 ᐊᑎᔅᑕᐃᒡ ᐊᓐᑕ ᓂᔅᑯᒧᐅᓯᓇᐃᑭᓂᒡ ᑲᐛᐎᑕᑲᓄᒡ ᒪᒧ ᑲᓇᒋᐱᔅᑕᑐᓇᓄᒡ᙮ ᐊᓇ ᒐᒂᓐ ᑲᑐᑕᑲᓄᒡ ᒋᒥᔅ ᐱ ᑭᔭ ᓇᔅᑲᐱ [ᐅᑕ ᑯᐸᒃ] ᐎᐃᓱᐛᐅᓐ ᑲᑐᑕᑲᓄᒡ ᐊᓐᑕ ᑲᐃᑎᓴᐃᑲᓄᒡ ᐊᑐᐛ ᒋᓴᐅᒋᒪᐤᒋᐛᐱᒡ ᐊᓐᑕ ᒍᓐᐱᓯᒺ 14,1984 ᐱᐳᓐ ᑲᐃᑎᔅᑕᒡ᙮

ᐊᓇ ᒋᒥᔅ ᐱ ᑭᔭ ᓇᔅᑲᐱ [ᐅᑕ ᑯᐸᒃ] ᐎᐃᓱᐛᐅᓐ ᑲᑐᑕᑲᓄᒡ ᒐᒋ ᒥᔭᑲᓄᒡ ᓇᔅᑲᐱ ᑭᔭ ᒋᒥᔅ ᐱ ᐃᔪᒡ ᒐᒋ ᐊᔭᑎᓐᑎᓱᒡ᙮ ᐊᓇ ᔭᐱᒡ ᒐᒋ ᑎᒂᒡ ᐊᑕᒡ ᐃᔪᒋᒪᑲᓐᒡ ᐊᓐᑕ ᑲᑐᑕᑲᓄᒡ ᐃᔪᐤ ᐃᑎᓱᐛᐅᓂᒡ ᑭᔭ ᐱᔅᒐ ᓱᒋᔪᐅᓐ ᐊᓐᒡ ᑲᑐᔅᑲᔅᑕᑲᓄᒡ ᐃᔪᐤ ᒋᓴᐅᒋᒪᑲᓂᒡ ᐊᓐᑕ ᐊᓇᓴᐃᑲᓄᒡ ᐃᔪᐤ ᐃᑎᓱᐛᐅᓐ ᐊᓐᑕ ᑲᐤ ᑲᐃᓱᐱᔅᑎᓂᒧᐛᑲᓄᒡ ᓇᔅᑲᐱ ᑭᔭ ᒋᒥᔅ ᐱ ᐃᔪᒋᒪᑲᓐᒡ ᐎᐃᐛᐤ ᒐᒋ ᐊᑐᔅᑲᔅᑕᒡ᙮ ᐊᓐᒡ ᓇᔅᑲᐱ ᑭᔭ ᒋᒥᔅ ᐱ ᐃᔪᒋᒪᑲᓐᒡ ᔭᐱᒡ ᑲᒥᔭᑲᓄᒡ ᑎᐸᓐ ᓱᒋᔪᐅᓂᔪᐤ ᐊᓐᑕ ᐊᑲ ᒥᓯᓇᑕᐃᑲᓄᒡ ᐊᓐᑕ ᐃᔪᐤ ᐃᑎᓱᐛᐅᓂᒡ ᑭᔭ ᒧᔭᒻ ᐊᓐᑕ ᐊᓯᑲᓄᐛᐃᑕᑲᓄᐃᒡ ᐊᓐᑕ ᐅᑕᓇᐛ ᐅᑕ ᑲᓇᑕ᙮

ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓐ NEQA ᒪᒧ ᑲᓇᒋᐱᔅᑕᑐᓇᓄᒡ ᑲᒋᑕᐸᑕᑲᓄᒡ ᐊᓇ ᓴᐱᐸᐤ ᐅᑕᓇᐤ ᐊᔅᑯ ᒐᒋ ᐱᒥᐱᐃᒂ ᐊᑐᔅᒐᐅᓐ ᓯᓂ ᐛᒧᓇᐃᑲᓄᒡ ᑭᔭ ᑯᔅᒐᐅᒋᐛᑉ ᐊᑐᔅᒐᐅᓐ ᑭᔭ ᐊᓇᑐᐛᐸᑕᑲᓄᒡ ᓯᓂᔾ ᑲᐃᔅ ᒋᑕᐸᑕᑲᓄᒡ ᐊᓐᑕ ᓂᑲᓄᒡ᙮ ᑲᓇᑐᔅᒐᐃᑕᒡ ᐃᔨᒧᐅᓂᔪᐤ ᑯᐸᒃ ᒋᓴᐅᒋᒪᑲᓐᒡ ᐊᓂᔭ ᐊᑲᓇᐛ IOC 1970 ᐱᐳᓐ ᑲᐃᑎᔅᑕᒡ ᐊᑐᔅᒐᐅᓐ ᐊᒋᑕᐸᑕᑲᓄᒡ᙮ IOC ᐊᑲᓇᐤ 1982 ᐱᐳᓐ ᑲᐃᑎᔅᑕᒡ ᐊᑯᑕ ᐊᑐᔅᒐᐅᓐ ᑲᒋᐸᐃᑲᓄᒡ ᐊᓐᑕ ᓴᐱᐸᐤ᙮

ᐊᓇ ᐊᑐᔅᒐᐅᓐ ᑲᒋᐸ ᐊᑲᓇᐤ ᐊᓐᑕ ᓴᐱᐸᐤ ᒥᒐᑦ ᒐᒂᓐ ᐊᓐᑕ ᑲᒪᑕᐃᑕᒂᒡ ᐊᓐᑕ ᓂᔅᑯᒧᐅᓯᓇᐃᑭᓂᒡ ᑭᔭ ᐊᓐᑕ ᑲᐎᐛᐎᒋᐛᓄᒡ ᐊᐧᑯᓱᐅᓐ ᑭᔭ ᐊᑐᔅᒐᐅᓐ ᒐᒋ ᔅᑯᑎᒪᑎᓱᓇᓄᒡ ᑭᔭ ᐊᑐᔅᒐᐅᓐ ᒐᒋ ᒋᒥᑕᑲᓄᒡ᙮ 1980 ᐱᐳᓐ ᑲᐃᑎᔅᑕᒡ, ᐊᓐᒡ ᓇᔅᑲᐱ ᐃᔪᒋᒪᑲᓐᒡ ᑭᔭ ᐊᑐᐛ ᒋᓴᐅᒋᒪᑲᓐ ᒪᒧ ᑲᓇᑐᔅᒐᐃᑕᒡ ᐊᓂᔭ ᐊᑐᐛ ᑲᐃᔅ ᐱᔅᑎᓇᒃ ᐱᔅᒐ ᒐᒂᔪᐤ ᐊᓐᑕ ᑲᐃᓯᓇᑯᓂᒡ ᒐᒋ ᐛᐎᒋᐛᑦ ᐊᓐᑕ ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓂᔪᐤ᙮ ᐊᓇ ᐊᓇᑐᔅᒐᐃᑕᑲᓄᒡ ᐃᔨᒧᐅᓐ ᑲᑐᔅᑲᔅᑕᑲᓄᒡ ᐅᓴᒻ ᐊᓐᑕ ᓴᐱᐸᐤ ᑲᒪᑕᐃᑕᒡ ᓇᔅᑲᐱ ᑭᔭ ᐊᓐᑕ ᐊᑐᐛ ᐊᑲ ᐅᒡ ᑲᓄᐛᐃᑕᒃ ᐅᑎᐃᔨᒧᐅᓐ ᐊᓐᑕ ᒐᐃᔅ ᐛᐎᒐᑦ ᓇᔅᑲᐱ ᐊᓐᑕ ᐊᒋᑕᐸᑕᑲᓄᒡ ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓯᓇᐃᑭᓐ᙮

ᐊᓐᑕ ᑲᐃᑎᑯᑕᒡ ᒪᒧ ᑲᓇᒋᐱᔅᑕᑐᓇᓄᒡ ᐊᓇ ᑲᑐᑕᑲᓄᒡ ᑯᑎᒃ ᓂᔅᑯᒧᐅᓐ ᐊᒋᑕᐸᑕᑲᓄᒡ ᒐᒋ ᐊᑐᔅᑲᔅᑕᑲᓄᒡ ᐊᓇ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ ᐊᓐᑕ ᑲᒥᓯᓇᑕᐅᑎᓱᓇᓄᒡ ᐅᔅᑲᐅᐱᓯᒻ,1990 ᐱᐳᓐ ᑲᐃᑎᔅᑕᒡ᙮ ᑯᑎᒃ ᒐᒂᓐ ᐊᓇ ᓂᔅᑯᒧᐅᓐ ᑲᒋᒥᑕᑲᓄᒡ ᐊᓇ ᐃᔪᔅᒋᔾ ᐊᒋᑕᐸᑕᑲᓄᒡ ᒐᒋ ᐊᑐᔅᑲᔅᑕᑲᓄᒡ Capital Budget ᑭᔭ ᐊᑐᔅᒐᐅᓐ ᓱᓇᔭᐤ O/M Budget ᒐᒋ ᐱᒧᑯᑕᒡ ᐃᔅᐱᔅ ᐱᑕᑕᒡᑕᑐᐳᓇ ᑭᔭ ᑲᑐᑕᓄᒡ ᐊᓇ ᑕᑈᒧᐅᓐ ᒥᓯᓇᐃᑭᓐ ᒐᐃᓯᐱᒧᑕᓄᒡ ᐊᓐᑕ ᒐᒂᓐ ᐛᒋᐱᐃᒡ ᐊᓐᑕ ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓯᓇᐃᑭᓂᒡ ᑭᔭ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓯᓇᐃᑭᓂᒡ ᑭᔭ ᓂᔅᑯᒧᐅᓐ ᐊᑐᔅᑲᔅᑕᑲᓄᒡ ᓂᔅᑯᒧᐅᓯᓇᐃᑭᓐ ᑭᔭ ᒐᒋ ᒋᒥᑕᑲᓄᒡ ᑲᒪᒧᐎᓇᓄᒡ ᒪᒧ ᒐᒂᓐ ᐊᑐᔅᑲᔅᑕᑲᓄᒡ ᒐᒋ ᐱᔅᑎᓇᑲᓄᒡ ᐃᔨᒧᐅᓐ ᐊᑐᔅᒐᐅᓐ ᑭᔭ ᓇᔅᑲᐱ ᐃᔪᒡ ᐊᒋᑕᐱᒪᑲᓄᒡ᙮