ᐊᓐᑕ ᐅᑕᒡ, ᓇᔅᑲᐱ ᐃᔪᒡ ᑲᐱᐸᒧᑕᒡ ᑭᔭ ᑲᓇᓴᐛᒡ ᐊᑎᐧᒄ ᐊᓐᑕ Nuchimiyuschiiy ᓄᒋᒥᔪᔅᒋᔾ ᐊᓐᑕ ᐊᑎᓴᓐ ᐸᔾ ᐊᓐᑕ ᐊᑎᒪ ᐱᓯᒧᑕᒡ ᐃᔅᐱᔅ ᐊᓐᑕ ᓇᐱᑥᐤ ᐎᓂᐸᑯᒡ ᐊᓐᑕ ᐛᐱᓄᑕᒡ ᐃᑕᐅᓂᒡ, ᑭᔭ ᐊᓐᑕ ᓴᐅᓄᒡ ᐎᓂᐸᑯᒡ ᐊᓐᑲᐸ ᐱᔾ ᐊᓐᑕ ᒋᐛᑎᓄᒡ ᐊᓐᑕ ᐃᔅᐱᔅ ᓇᐱᑥᐤ ᓴᐅᓄᒡ ᐃᑕᐅᓂᒡ᙮ ᐅᔅᑲᒡ ᑲᐅᔅᑕᐱᓯᓂᒡ ᐊᓐᑕ ᑈᑦ ᒐᐃᒧᐤ ᐊᓐᑕ ᐊᓱᐎᒍᑕᑲᓄᒡ ᑯᒍᐛᒃ, ᐊᓐᑕ 1830 ᐱᐳᓐ, ᐊᓐᒡ ᓇᔅᑲᐱ ᑕᑐᐎᒡ ᑲᑐᒐᒡ ᑲᔭᑎᐱᒐᒡ ᑈᑦ ᒐᐃᒧᐤ ᑭᔭ ᐊᓐᑕ ᑈᑦ ᓇᔅᑯᐱᔾ, ᐛᔅᑲᐃᑭᓂᔅ ᑭᔭ ᓴᐱᐸᐤ ᐃᑕᐅᓂᒡ, ᑕᑐᐎᒡ ᐊᓐᑕ ᑲᑎᑎᔭᑲᓄᒡ ᐛᐃᐱᔅᒋᔅ᙮ ᐊᓐᑕ ᒪᔅᑕᔭ ᑲᑕᔭᑲᓄᒡ ᑲᐛᐛᒋᑲᒪᒡ ᐃᔪᔅᒋᔪᐤ, 12 ᐊᔅᐱᓯᓇᑯᓂᒡ ᒋᐛᑎᓄᒡ ᐛᐱᓄᑕᒡ ᐊᓐᑕ ᐅᑕᓇᒡ ᓴᐱᐸᐤ, ᐊᓐᑕ 1980 ᐱᐳᓂᔪᐤ ᑲᐃᑎᔅᑕᐃᒡ᙮

ᐊᑎᓱ ᐊᓐᑕ ᑲᔭᑕᔭᑲᓄᒡ, ᓇᔅᑲᐱ ᐊᔅᑯ ᐊᓐᑕ ᐃᔪᐤ ᐃᑐᐅᔪᐤ ᐱᒪᑎᓯᔪᐅᓂᔪᐤ ᑲᑲᓄᐛᐃᑕᒡ ᑭᔭ ᐊᔅᑯ ᐊᓐᑕ ᑲᐱᒋᑕᒡ Nuchimiyuschiiy ᓄᒋᒥᔪᔅᒋᔪᐤ ᒐᒋ ᐊᓐᑐᐅᒡ ᐊᓐᑐᐅᓂᒪᓴᒡ ᑭᔭ ᐊᓐᑐᐅᒪᓂᔪᒡ, ᐃᔪᐤ ᐃᑐᐅᓐ ᑲᐸᒡ ᐊᐱᒋᑕᑲᓄᒡ ᐊᔅᒋᔾ ᑭᔭ ᑎᐸᓐ ᐃᑕᐅᓇ ᑲᐸᒡ ᐊᐱᒋᑕᒡ᙮

ᐊᓐᑕ 1978 ᐱᐳᓐ, ᐊᓐᒡ ᓇᔅᑲᐱ ᐃᔪᒋᒪᑲᓐᒡ ᐅᑕ ᑲᐛᐛᒋᑲᒪᒡ ᑲᒥᓯᓇᑕᐅᑎᓱᒡ (NEQA) ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓂᔪᐤ ᒪᒧ ᐊᓂᔭ ᑯᐸᒃ ᑭᔭ ᑲᓇᑕ ᒋᓴᐅᒋᒪᑲᓇ᙮ ᐊᓐ ᓂᔅᑯᒧᐅᓐ ᐊᓐᑕ ᓂᔅᑐᐛᐸᑎᒧᐅᓐ ᑎᐱᐛᐅᓯᔪᐅᓐ ᐊᑭᔅᑭᑎᔅᑕᒡ 35 ᐊᓐᑕ ᑲᓇᑕ ᐎᓱᐛᐅᓂᒡ, 1982 ᐱᐳᓐ, ᐊᓐᑕ ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓐ ᑲᒥᓯᓇᑕᐅᑎᓱᓇᓄᒡ ᐊᓐᑕ ᐸᐃᑯᑕᐤ ᓴᓯᑲᓐ ᐊᓯᐱᒧᑕᓄᒡ ᒧᔭᒻ (JBNQA) ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ ᑭᔭ ᐊᓐᑕ ᐊᔭᑲᓄᒡ ᓇᔅᑲᐱ ᐸᐃᑯᑕᐤ ᑯᐸᒃ ᓂᔅᑯᒧᐅᓇ ᑲᒥᓯᓇᑕᐅᑎᓱᒡ ᐊᓐᒡ ᒋᒥᔅ ᐱ ᐃᔪᒡ ᑭᔭ ᐃᔅᒋᒪᐅᓐ ᐊᓐᑕ JBNQA ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓂᒡ᙮

ᐊᓂᔭ (NEQA) ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓐ ᑭᔭ JBNQA ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ ᑲᐎᑲᐳᐎᑕᑲᓄᒡ ᐊᔅᒋᔭ ᐊᔭᑎᓇᑲᓄᒡ ᑎᐱᐛᐅᓯᔪᐅᓐ ᐊᓐᑕ ᑲᐃᓯᐎᒍᑕᑲᓄᒡ Rupert’s Land ᐊᔅᒋᔾ᙮ ᐊᓐᑕ ᔭᐱᒡ ᑲᐎᑲᐳᐎᑕᑲᓄᒡ “ᐊᔅᒋᔾ ᐊᔅᑕᐃᑕᒂᒡ” ᑭᔭ ᐊᔅᒋᔾ ᐊᑎᐧᒄ ᐊᑎᐃᑕᑦ ᐊᓐᑕ ᐊᔅᐱᑕᐃᑕᑲᓄᒡ ᐃᑎᓱᐛᐅᓐ ᐊᓯᓇᓴᓇᑲᑐᐛᐃᑕᑲᓄᒡ ᓄᑎᒻ ᐊᓯᓐᑐᐅᓇᓄᒡ᙮ ᐊᓐᑕ ᔭᐱᒡ, (NEQA) ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓐ ᑲᐎᑲᐳᐎᑕᑲᓄᒡ ᓇᔅᑲᐱ ᐃᑕᐅᓐ ᐊᔅᑕᐃᑕᒂᒡ ᑭᔭ ᐊᔅᒋᔾ ᐛᓇᑲᑐᐛᐃᑕᑲᓄᒡ ᐊᓐᑕ ᐊᑲᔅᑕᐅᑯᒡ ᐃᔅᒋᒪᐅᒡ ᑭᔭ ᓇᔅᑲᐱ, ᒪᒧ ᐊᓐᑕ ᐊᒋᒥᑕᑲᓄᒡ ᓇᔅᑲᐱ ᐊᔅᒋᔾ ᑎᐱᐛᐅᓯᔪᐅᓐ, ᔭᐱᒡ ᐊᓐᑕ ᐃᔅᒋᒪᐅᒡ ᑭᔭ ᓇᔅᑲᐱ ᐊᑎᐧᒄ ᐃᑕᐅᓐ ᑭᔭ ᒋᒥᔅ ᐱ ᑭᔭ ᓇᔅᑲᐱ ᐊᑎᐧᒄ ᐃᑕᐅᓐ, ᓄᑎᒻ ᐊᓐᑕ ᐊᑲᔅᑕᐃᑲᓄᒡ ᒋᐛᑎᓄᒡ ᐛᐱᓄᑕᒡ ᐊᔅᒋᔾ ᐅᑕ ᑯᐸᒃ᙮ ᐅᔭ ᐃᑕᐅᓇ ᐊᔅᑎᒋᑕᑲᓄᒡ ᐊᓐᑕ ᐃᑕᐅᓐ ᓯᓂᔾ ᐊᑕᐸᑭᔅᑕᒡ ᐊᓐᑕ ᓇᐱᑥᐤ ᐊᔅᒋᒡ, ᐊᓐᑕ ᑲᐸᒡ ᒧᓇᐃᑲᓄᒡ ᓯᓂᔾ ᐊᑐᔅᒐᐅᓐ ᐊᓐᑕ 1950 ᐱᐳᓐ ᑲᐃᑎᔅᑕᒡ᙮

ᓇᔅᑲᐱ ᔭᐱᒡ ᐊᓐᑕ ᐊᔅᑯ ᐊᑲ ᒥᔪᔅᑕᑲᓄᐃᒡ ᐊᔅᒋᔪᐤ ᑎᐱᐛᐅᓯᔪᐅᓂᔪᐤ ᐊᓐᑕ ᓇᐱᑥᐤ᙮