ᐃᔪᐤ ᐱᒪᑎᓯᔪᐅᓐ, ᓇᔅᑲᐱ ᒐᒂᓐ ᐊᐛᓯᑕᑲᓄᒡ ᑭᔭ ᑯᔅᒋᒂᓱᐅᓇ ᐊᓐᑕ ᓄᑎᒻ ᑲᐅᒡ ᐅᓯᑕᑲᓄᒡ ᐊᐱᒋᑕᑲᓄᒡ ᒧᔭᒻ ᐊᔅᒋᔾ, ᒥᔅᑎᒄ, ᓂᒪᔅ ᑭᔭ ᐊᔅᑕᐃᑕᑯᔅᑦ ᐊᑎᒄ᙮ ᑕᑈ ᒥᔅᑲᑕᔨᑕᑯᓐ ᓇᔅᑲᐱ ᒋᐧᑲᓂᓯᓄᒡ ᑲᐃᔅ ᐛᓯᑕᒡ ᒐᒂᔪᐤ ᐊᓐᑕ ᑲᐱᒋᑕᒡ ᑲᑐᔅᑲᐛᒐᒡ ᑲᐃᔅ ᑲᓄᐛᐃᑕᒡ᙮ ᒋᑲᓂᓯᓄᒡ ᐎᐃᐛᐤ ᑲᑐᑐᐛᒡ ᐊᑎᐧᑯᔭᓇ, ᓴᔅᑎᒂᔭᐱᔾ, ᐅᔅᑲᒋᐧᒄ, ᑭᔭ ᑯᑎᑲ ᐊᑐᔅᒐᐛᑭᓇ ᑭᔭ ᒐᒂᓇ ᐊᓄᑕᐱᐃᒋ᙮ ᐊᒥᓴᒡ ᑕᑈᐅᒐᔨᑎᒧᐅᓐ, ᐊᑐᔅᑲᔅᑕᑲᓄᒡ ᑭᔭ ᓴᒋᐛᐅᓐ ᒥᓯᐛ ᑲᐱᔅᑎᓇᑲᓄᒡ ᒐᒂᓐ ᑲᐅᓯᑕᑲᓄᒡ᙮
ᐊᓐᑕ ᒥᒐᑦ ᑕᑎᐳᓇ, ᓇᔅᑲᐱ ᐃᔪᒋᒪᑲᓐᒡ ᑲᐛᐎᒐᐅᓯᒡ ᑭᔭ ᓱᓇᔭᔪᐤ ᐊᓂᔭ ᓇᔅᑲᐱ ᑲᐛᐎᒋᐛᒡ ᒥᒐᑦ ᑲᐅᓯᑕᑲᓄᒡ ᒐᒂᓐ ᑭᔭ ᐊᑯᔅᒋᒂᓱᐅᓇᓄᒡ᙮ ᐊᓂᔭ ᑲᔅᑯᑎᒪᒐᓄᒡ ᐊᑐᔅᒐᐅᓐ ᑲᑐᑕᑲᓄᒋ ᐊᔅᑎᒋᑕᑲᓄᒡ ᐱᔅᒐᑭᓯᓇ, ᐃᔪᐤ ᐊᔅᑎᓯᒡ, ᐅᐛᔅ ᐊᑯᒍᔭᓐ, ᐃᔪᐤ ᑭᓂᔎᐅᓇ, ᒥᔅᑎᐧᑯᐎᔾ ᐊᑐᑐᐛᑲᓄᑦ ᐊᑎᐧᑯᔭᓐ, ᐊᓐᑕ ᓄᒋᒐ ᑲᑐᑕᑲᓄᒡ ᐃᔪᐤ ᐃᑐᐅᓐ ᐊᓐᑕ ᐱᓂᐎᐅᐱᓯᒺ 2021 ᐊᓐᑕ ᐸᐃᑯᔪᐤ ᓇᔅᑲᐱ ᑲᓴᒥᒐᓄᒡ᙮
ᓇᔅᑲᐱ ᐊᑯᑉ Naskapi Coat
ᓇᐸᐤ ᐊᐳᔅᑲᑦ ᐅᔭ ᐊᑎᐧᑯᔭᓐ ᐊᑯᑉ ᐊᓐᑕ ᑲᐛᐸᑎᔭᑦ ᐊᓂᓇᔅᑯᒧᐅᑦ ᑭᔭ ᐊᔅᑕᐃᑕᑯᓂᒡ ᐛᔭᐱᒋᑕᑦ ᐊᑎᒄ ᐅᑕᒐᐧᒂ ᐊᓐᑕ ᑲᓐᑐᑎᒂᑦ᙮ ᐊᐅᑯᓐ ᐃᔪᐤ, ᐊᓐᑕ ᑲᐱᒪᑎᓯᑦ ᒋᐛᑎᓄᒡ ᐛᐱᓄᑕᒡ ᑯᐸᒃ ᑭᔭ ᓇᐱᑥᐤ᙮ ᓄᑎᒻ ᐊᓐᑕ ᐊᔅᒋᔪᐤ ᑲᐱᒻᒥᒋᒡ ᑲᓐᑐᐅᑦ, ᐊᓐᑕ ᑲᐱᑲᔅᒋᑯᑦ ᐊᑎᒂ ᑭᔭ ᒐᐅᒡ ᐊᐱᒋᑕᑦ ᐛᒍᐛᓯᑕᑦ ᐅᑕᐱᒋᑕᐅᓐ ᑭᔭ ᐊᑐᔅᒐᐅᓐ ᐊᐱᒋᑕᐅᓐ ᑭᔭ ᒐᒂᓂᔪᐤ ᒐᐱᒋᑕᑦ ᐊᓐᑐᐅᑦ᙮
ᐊᓐᑕ ᓂᐱᓐ ᐊᑯᑉ ᐊᐅᑯᑦ ᐊᑎᑯᔭᓐ ᓇᔅᑲᐱ ᑲᒪᓐᑕᐅᓯᓇᑕᑦ ᐎᐃᐛᐤ ᐊᓯᓂᔅᑐᐛᐱᒥᑎᓱᒡ᙮ ᑕᑐᐎᒡ ᑲᓯᓇᑯᓂᒡ ᐊᒪᑕᐅᓯᓇᐃᒐᒡ ᒧᔭᒻ ᓂᒪᔅ ᐅᐛᐅᒪ, ᑲᐎᓴᐛᒡ ᐊᑕᑎᐳᓇᓯᓇᓄᒡ, ᐊᔅᑯ ᐊᓐᑕ ᑲᐛᐱᓯᑦ ᑲᓂᔅᑯᐛᑲᓄᑦ, ᐊᓯᐸᓴᐃᑲᓄᒡ ᐊᓐᑕ ᓂᐱᔾ ᑭᔭ ᓯᓂᔭ ᐊᒥᔎᒡ ᑭᔭ ᑲᐎᓴᐛᒡ ᑲᐱᒋᑕᑲᓄᒡ, ᐊᓐᑕ ᑲᐱᔅᑲᐸᑕᑲᓐᒋ ᐊᓐᑕ ᑲᐛᐱᓯᑦ ᑲᑕᑦ ᒐᒋ ᑕᐛᒐᓄᒡ ᐊᐱᒋᑕᐅᓐ᙮
